„ფოთოლცვენის ავანტიურები“ — მეხუთე ლექცია კინომცოდნისა და კინოკრიტიკოს მანანა ლეკბორაშვილის ციკლიდან: „სამოციანები და სამოციანელები — ქართული კინოს ოქროს ხანა“.

ღონისძიება დაიწყება 19:00 საათზე ფილმ „ფოთოლცვენის“ ჩვენებით, ხოლო 20:40-ზე გადავდივართ ლექციურ ნაწილზე და ვისაუბრებთ ოთარ იოსელიანის შემოქმედებაზე.

ფილმი მოგვითხრობს ახალგაზრდა ტექნოლოგ ნიკოზე, რომელიც იწყებს მუშაობას ღვინის ქარხანაში და ეჯახება სისტემას, რომელიც არღვევს როგორც საწარმოო, ასევე მორალურ პრინციპებს. იგი უარს ამბობს კომპრომისზე სინდისთან და ცდილობს შეინარჩუნოს შინაგანი სიმართლე და ღირსება — როგორც პროფესიულ, ისე პირად ცხოვრებაში. ეს არის დუმილით, მაგრამ მტკიცედ გამართული წინააღმდეგობა სამყაროში, სადაც გულწრფელობა სისუსტედ აღიქმება.

ფილმი იწყება დოკუმენტური ეპიგრაფით ტრადიციულ ქართულ მეღვინეობაზე, ხოლო ძირითადი მოქმედება მიმდინარეობს კვირის დღეებად დაყოფილ „თავებად“.