ზაქარია ფალიაშვილის მემორიალური სახლ-მუზეუმი

მისამართი: დ. ბაქრაძის ქ. 10, 0108, თბილისი, 

სამუშაო დღეები: ყოველი დღე, 

სამუშაო საათები 10:00-18:00 სთ; 

ქ. თბილისში, ბაქრაძის ქუჩა N 10-ში, 1915 წლიდან 1933 წლამდე, გარდაცვალებამდე, ცხოვრობდა და მოღვაწეობდა დიდი ქართველი კომპოზიტორი, ქართული საოპერო მუსიკის ფუძემდებელად აღიარებული, ზაქარია პეტრეს ძე ფალიაშვილი. ცხოვრების დიდი ნაწილი და შემოქმედებითი წარმატებები სწორედ ამ სახლთან არის დაკავშირებული. 

მუზეუმის დაარსების შესახებ პირველი დადგენილება 1959 წლიდან არსებობს. ბინაში ცხოვრობდა კომპოზიტორის ძმისშვილი (რომელსაც ზაქარია ფალიაშვილმა ანდერძით დაუტოვა ბინა და მნიშვნელოვანი ნივთები,) და სხვა ნათესავები, რომლებმაც კეთილი ნების საფუძველზე ბინა გადასცეს მუზეუმს. 

1962 წლის 2 ოქტომბერს, სიმბოლურად, ზაქარია ფალიაშვილის გარდაცვალების დღეს, საზეიმოდ გაიხსნა ზაქარია ფალიაშვილის მემორიალური სახლ-მუზეუმი და პირველი ექსპოზიცია. 

მუზეუმში დაცულია დიდი ქართველი კომპოზიტორის ზაქარია ფალიაშვილის (1871-1933 წ.წ.) ცხოვრებასა და მოღვაწეობასთან დაკავშირებული მასალები: მემორიალური ნივთები, პირადი არქივი, კომპოზიტორის მიერ შექმნილი ოპერების (”აბესალომ და ეთერი”, ”დაისი”) პარტიტურების ორიგინალები, პირველი დადგმების აფიშები, სხვადასხვა დოკუმენტური და ფოტო მასალა, ხელნაწერები, ბიბლიოთეკა და სხვა. 

მუზეუმის დაარსებისთანავე დაიწყო ზრუნვა კოლექციებზე. ექსპონატების ნაწილი შეისყიდეს ახლო ნათესავებისგან, ზოგიც საჩუქრად გადმოეცა მუზეუმს. მასალა შეგროვდა კერძო პირებისგან, სხვადასხვა დაწესებულებებიდან, თბილისის ვანო სარაჯიშვილის სახელობის სახელმწიფო კონსერვატორიიდან, თბილისის ოპერისა და ბალეტის თეატრიდან და სხვა.

„ახალგაზრდული ბარათის“ მფლობელთათვის, შესაბამისი დოკუმენტის წარდგენით, ყველა მუზეუმში შესასვლელ ბილეთებზე მოქმედებს ფასდაკლება 20%-ის ოდენობით. ბარათის გამოყენება შესაძლებელია მხოლოდ ადგილზე.

შესაბამისი დოკუმენტის წარდგენით მუზეუმში შესვლა უფასოა: 

➢ ICOM-ის წევრებისთვის; 

➢ პენსიონერთათვის; 

➢ შეზღუდული შესაძლებლობის მქონე პირთათვის; 

➢ 6 წლამდე ბავშვებისთვის; 

➢ სოციალურად დაუცველი და იძულებით გადაადგილებული პირებისთვის;

➢ საქართველოს ტერიტორიული მთლიანობის, თავისუფლებისა და დამოუკიდებლობისათვის საბრძოლო მოქმედების ვეტერანებისათვის და მათთან გათანაბრებული პირებისათვის.