სიცარიელეები

გადავხედავთ ჩვენს პირად საგანძურის ყუთს და კვლავ ამოვალაგებთ მის შიგთავსს — ამჯერად ვუყურებთ როუდ-მუვის, რომელიც თითქოს "ბონი და კლაიდიდან" იღებს სათავეს, თუმცა სინამდვილეში — სრულიად სხვაა.

ტერრენს მალიკის "უსიცოცხლო მიწების" (Badlands) განწყობა გადმოსაცემია მხოლოდ წვრილმანებით, სწორედ იმ პატარა დეტალებით, რომლებშიც თითქმის სრულად იშლება ფილმის ესთეტიკა. წარმოიდგინეთ, ცაში ამოფრენილი წითელი ბუშტი, ძაღლი მინდორში, დამწვარი სათამაშო სახლი და წყვილი — ჭორფლიანი გოგო დამწვარი პრერიის ფერის თმით და ბიჭი, რომელიც ცდილობს მაგარი ტიპი გამოჩნდეს. ისინი ჩარლსტონს ცეკვავენ მტვრიან გზისპირას, ფეხშიშველები, და შემდეგ — თითქოს მოულოდნელად, განზრახვის გარეშე — კლავენ. ისევ და ისევ...

ეს არის ამერიკელი რეჟისორის, ტერრენს მალიკის დებიუტი კინოში, რომელიც ფილმის გამოსვლიდან 20 წლის შემდეგ შეიტანეს აშშ-ის ეროვნული კინორეგისტრის გამორჩეულ ნამუშევრებს შორის. სიუჟეტის საფუძველს რეალური ამბავი წარმოადგენს — ჩარლზ სტარკუეზერისა და კერილ ფიუგეიტის 1958 წლის სისხლიანი ისტორია ნებრასკასა და მის მეზობელ შტატებში.