საქართველოს ტურიზმის ასოციაციის VI ყოველწლიური საერთაშორისო კონფერენცია – „ტურიზმი და განათლება “

საქართველოს ტურიზმის ასოციაციის VI ყოველწლიური საერთაშორისო კონფერენცია „ტურიზმი და განათლება“ წარმოადგენს პროფესიულ პლატფორმას, რომელიც აერთიანებს კერძო სექტორის, საჯარო უწყებების, საერთაშორისო ორგანიზაციების, უმაღლესი და პროფესიული საგანმანათლებლო დაწესებულებების წარმომადგენლებს.

ასოციაცია ღონისძიების ორგანიზებით მიზნად ისახავს ტურიზმის სექტორსა და საგანმანათლებლო დაწესებულებებს შორის თანამშრომლობის გაძლიერებას, დარგის საჭიროებების იდენტიფიცირებას, ერთობლივი სამომავლო ინიციატივების დაგეგმვას, საერთაშორისო სტანდარტებთან დაახლოებული თანამშრომლობის ინოვაციური მოდელის შექმნას და ტურიზმისა და სტუმარ-მასპინძლობის სექტორის უნარების განვითარების მიმართულებით საერთო სამოქმედო გეგმის შემუშავებას.

ღონისძიებაზე წარმოდგენილი იქნება საქართველოს ტურიზმის ასოციაციის მიერ ჩატარებული ტურიზმისა და სტუმარ-მასპინძლობის სექტორში უნარების საჭიროების კვლევის ანალიზის პრეზენტაცია და ძირითადი მიგნებები.

კონფერენცია წარმოადგენს პლატფორმას, სადაც სამი ძირითადი სექტორი — კერძო, საჯარო და საგანმანათლებლო დაწესებულებები — გააერთიანებენ ძალისხმევას ტურიზმისა და სტუმარ-მასპინძლობის სფეროში ადამიანური რესურსის განვითარებისთვის.

ღონისძიება წარიმართება ორი თემატური სესიის ფორმატში, რომლებშიც მონაწილეობას მიიღებენ სხვადასხვა სექტორის წარმომადგენლები. კონფერენციის დასკვნით ნაწილში, ვორქშოპისა და სოციალური დიალოგის ფორმატში, ორივე სესიის შედეგებზე დაყრდნობით, შემუშავდება ტურიზმისა და სტუმარ-მასპინძლობის სექტორის უნარების განვითარების მიმართულებით საერთო სამოქმედო გეგმა და სამომავლო თანამშრომლობის პრიორიტეტები.

ღონისძიების მეორე ნაწილს გაუძღვება უნარების განვითარების მიმართულებით ბრიტანელი ექსპერტი Jane (Rexworthy) Whitehart OBE, Managing Director of FIOL და Chartered FCIPD.

მოწვეულ სტუმრებს შორის იქნებიან საქართველოს ტურიზმის ასოციაციის წევრები, დამსაქმებლები, პარტნიორი ორგანიზაციები, საქართველოს განათლების, მეცნიერებისა და ახალგაზრდობის სამინისტრო, განათლების ხარისხის განვითარების ეროვნული ცენტრი, დონორი ორგანიზაციები, GIZ, GCCI, GNTA, უმაღლესი საგანმანათლებლო დაწესებულებები, პროფესიული კოლეჯები და სხვა დაინტერესებული მხარეები.

კონფერენცია ტარდება უკვე მეექვსედ და წარმოადგენს საქართველოში ტურიზმისა და განათლების სფეროების თანამშრომლობის ერთ-ერთ ყველაზე მნიშვნელოვან ყოველწლიურ პლატფორმას.

ღონისძიების მხარდამჭერია გერმანიის საერთაშორისო თანამშრომლობის საზოგადოება (GIZ). 

ასაკობრივი შეზღუდვა 16+