კინოკლუბი Auditori-ში: ფილმის „ოპენჰაიმერი“ (კრისტოფერ ნოლანი, 2023) ჩვენება და განხილვა

კინოკლუბი Auditori-ში: ფილმის „ოპენჰაიმერი“ (კრისტოფერ ნოლანი, 2023) ჩვენება და განხილვა

ხვალ კრისტოფერ ნოლანის ახალი ფილმი „ოდისეა“ გამოდის. გადავწყვიტეთ, რომ ეს საუკეთესო დროა მისი წინა ფილმის გასახსენებლად — ან პირველად სანახავად, თუ აქამდე არ გქონიათ ამის შესაძლებლობა.

ამ კვირას ვუყურებთ „ოპენჰაიმერს“ — მასშტაბურ ბიოგრაფიულ დრამას, რომელმაც ოსკარის შვიდი ჯილდო მოიპოვა, მათ შორის საუკეთესო ფილმისა და საუკეთესო რეჟისურისთვის.

ფილმის მთავარი გმირია ამერიკელი თეორიული ფიზიკოსი რობერტ ოპენჰაიმერი (კილიან მერფი), რომელსაც „ატომური ბომბის მამად“ მოიხსენიებენ. სიუჟეტი მოიცავს მისი ცხოვრების უმნიშვნელოვანეს ეტაპებს: საიდუმლო მანჰეტენის პროექტის ხელმძღვანელობას, პირველი ბირთვული გამოცდის — „ტრინიტის“ — ჩატარებას, ომისშემდგომ პოლიტიკურ დევნასა და მძიმე მორალურ ბრძოლას იმ იარაღის შექმნის გამო, რომელსაც კაცობრიობის განადგურება შეეძლო.

კილიან მერფისთან ერთად ფილმში მონაწილეობენ რობერტ დაუნი უმცროსი, ემილი ბლანტი, მეტ დეიმონი და ფლორენს პიუ.

ჩვენების შემდეგ განვიხილავთ, როგორ იყენებს ნოლანი არახაზოვან თხრობას, საუნდდიზაინს და ფერადი და შავ-თეთრი კადრების მონაცვლეობას. ასევე ვისაუბრებთ ფილმის რთულ ეთიკურ დილემებსა და იმ ისტორიულ კონტექსტზე, რომელშიც მოვლენები ვითარდება.