დაცვენილი ფოთლები

ინტროვერტ ქალს მარტოობას მხოლოდ რადიო უმსუბუქებს, მაგრამ იქაც კარგი არაფერია — გაუჩერებლად გადმოსცემენ საშინელ ამბებს რუსეთის ომზე უკრაინასთან. ერთხელაც, ის იცნობს ისეთივე მარტოხელა და სევდიან ალკოჰოლიკს, და ერთად მიდიან კინოში ჯარმუშის ფილმის — „მკვდრები არ კვდებიან“ — სანახავად (რადგან ყველამ იცის, რომ კაურისმაკი და ჯარმუში ძველი უახლოესი მეგობრები არიან). ყველაფერი იქნება სევდიანიც და სასაცილოც (ერთდროულად), მაგრამ ბოლოს — ყველაფერი კარგად დამთავრდება.

ეს არის ჩვენთვის საყვარელი ფინელი მელანქოლიკოსის — აკი კაურისმაკის — ყველაზე ახალი ფილმი. თავად აკიმ მას თავისი „პროლეტარული ტრილოგიის“ მეოთხე ნაწილი უწოდა (რა თქმა უნდა, ირონიულად). ეს არის მშვიდი, ლამაზი ისტორია სიყვარულზე, იმედგაცრუებასა და იმედზე, რომელსაც კანის კინოფესტივალზე ხანგრძლივი აპლოდისმენტები მოჰყვა — სანამ მორცხვი და თავმდაბალი კაურისმაკი დარბაზიდან არ გაიქცა.

ჟიურის პრიზი — კანის კინოფესტივალი, 2023 წ.