თამარ მუქერიას წიგნის „Grande Maestro - ჯორჯო სტრელერის“ პრეზენტაცია

საქართველოს შოთა რუსთაველის თეატრისა და კინოს სახელმწიფო უნივერსიტეტის დიმიტრი ალექსიძის სახელობის სასწავლო თეატრის ფოიეში გაიმართება ამავე უნივერსიტეტის მოწვეული ლექტორის, ხელოვნებათმცოდნეობის დოქტორის, თეატრმცოდნე თამარ მუქერიას წიგნის „Grande Maestro - ჯორჯო სტრელერის“ პრეზენტაცია. 

დამხმარე სახელმძღვანელო გამოსცა თეატრისა და კინოს სახელმწიფო უნივერსიტეტის გამომცემლობამ „კენტავრი“. გამოცემის რედაქტორია ხელოვნებათმცოდნეობის დოქტორი, საქართველოს შოთა რუსთაველის თეატრისა და კინოს სახელმწიფო უნივერსიტეტის პროფესორი მარინე (მაკა) ვასაძე. 

ავტორი იკვლევს იტალიელი რეჟისორის, ჯორჯო სტრელერის შემოქმედებას და XX საუკუნის იტალიური თეატრის 50-წლიან განვითარებას. ნაშრომი ასახავს თეატრალურ რეფორმებს, ახალი რეჟისორული ხედვების ჩამოყალიბებასა და პიკოლო თეატრის მნიშვნელოვან როლს იტალიური თეატრის ევროპულ კულტურულ სივრცეში დაბრუნების პროცესში. 

ეს წიგნი პირველი მცდელობაა ქართულ თანამედროვე თეატრმცოდნეობაში - შეისწავლოს XX საუკუნის დასავლეთ ევროპაში, კერძოდ კი იტალიაში მიმდინარე თეატრალური პროცესები, ჯორჯო სტრელერის შემოქმედების მაგალითზე.

წიგნის ყდაზე გამოყენებულია გაბრიელა ბრანდენშტაინის ფოტო.