ფირის ფოტოგრაფიის ვორქშოპი

შავ-თეთრი ფირის ფოტოგრაფიის ვორქშოპი ორ დღეს მოიცავს და შაბათ–კვირას ტარდება. ის განკუთვნილია როგორც დამწყები, ასევე გამოცდილი ფოტოგრაფებისთვის — ყველასთვის, ვისაც აინტერესებს ანალოგური პროცესი გადაღებიდან ბეჭდვამდე. მონაწილეობა შეუძლია მათაც, ვისაც ფოტოაპარატთან აქამდე არ ჰქონია შეხება. პროგრამა ადაპტირდება მონაწილეების ცოდნის დონეზე: ზოგი თეორიული ნაწილი შეიძლება გამოტოვებული იქნას, ხოლო კონკრეტულ თემებს დამატებით ჩაუღრმავდებით ინტერესის მიხედვით. პირველი დღე მთლიანად ეძღვნება გადაღებისა და ფირის გამჟღავნების პროცესს. მონაწილეები გაიცნობენ კამერის მუშაობის პრინციპებს, საჭირო პარამეტრებს, ექსპოზიციას, განათებასა და კომპოზიციის საბაზისო წესებს. თეორიის შემდეგ იწყება პრაქტიკული გადაღება, რომლის დროსაც მონაწილეები ერთმანეთის პორტრეტებს გადაიღებენ. გადაღების დასრულების შემდეგ დეტალურად გაეცნობიან ფირის გამჟღავნების პროცესს: საჭირო ტექნიკას, მოწყობილობებს, ქიმიასა და მასალებს, ხოლო დღის ბოლოს თავადვე გაამჟღავნებენ თავიანთ ფირს და მიღებულ ნეგატივებს გაშრობისთვის მოამზადებენ. მეორე დღე მთლიანად ბეჭდვას დაეთმობა. მონაწილეები ისწავლიან ბეჭდვის პრინციპებს, საჭირო დანადგარებსა და შუქმგრძნობიარე ქაღალდისა და ქიმიის გამოყენებას. თეორიული ნაწილის მერე იწყება პრაქტიკული ბეჭდვა — უკვე გამშრალი ნეგატივებიდან თითოეული მონაწილე თავად ქმნის საკუთარ შავ-თეთრ ფოტოს. სურვილისამებრ, შესაძლებელია როგორც სრული ორდღიანი პროგრამით სარგებლობა, ასევე მხოლოდ ერთდღიან ვორქშოპში მონაწილეობა.