მარნის მოგონებები

Studio Ghibli-ს პირველი სრულმეტრაჟიანი ანიმაციური ფილმი, რომელიც ჰაიაო მიაძაკისა და ისაო ტაკაჰატას უშუალო რეჟისორული მონაწილეობით არ შექმნილა. „მარნის მოგონებები“ეფუძნება ბრიტანელი მწერლის ჯოან რობინსონის ამავე სახელწოდების რომანს, რომლის წაკითხვას თავად მიაძაკი ყველას განსაკუთრებულად ურჩევდა. ამიტომ გასაკვირი არ არის, რომ სწორედ Ghibli-მ გადაწყვიტა მისი ეკრანიზაცია.

ობლად დარჩენილი ანა ჩაკეტილი და უხეში ხასიათის გოგონაა. მას ხატვა ძალიან უყვარს, თუმცა მეგობრები არ ჰყავს. ყველაფერი იცვლება, როდესაც ჯანმრთელობის გასაუმჯობესებლად ჰოკაიდოზე მიემგზავრება და იქ თავის თანატოლს, მარნის, გაიცნობს. გოგონები სწრაფად მეგობრდებიან, მაგრამ დროთა განმავლობაში ანას უჩნდება განცდა, რომ მარნი შესაძლოა მხოლოდ მისი წარმოსახვის ნაყოფი იყოს.

ანას ისტორია გარკვეულწილად „მოჩვენებებით გატაცებული“ (Spirited Away) ფილმის ჩიჰიროს თავგადასავალს მოგვაგონებს. თუმცა თუ იქ მოქმედება სულების სამყაროში ვითარდებოდა, აქ ყველაფერი ადამიანების რეალობაში ხდება — რეალობაში, სადაც მოგონებებს, ოცნებებსა და წარმოსახვას ისეთივე ძალა აქვს, როგორც სინამდვილეს. Studio Ghibli-ის ფილმების მსგავსად, აქაც ზღვარი რეალობასა და ფანტაზიას შორის თითქმის შეუმჩნეველია.