მეორე აქტი

მსახიობები აღმოჩნდებიან გადასაღებ მოედანზე, რომელსაც ხელოვნური ინტელექტი მართავს. კინოსამყაროზე შექმნილი სატირული ისტორია Léa Seydoux-ისა და Louis Garrel-ის მონაწილეობით.

Quentin Dupieux-ის კინემატოგრაფის მთელი არსი აბსურდის ენით კინოს სამყაროში დამკვიდრებული წესებისა და კანონების ირონიულ და ხშირად მწარე გაშარჟებაშია. ამჯერად მან ყურადღება გაამახვილა როგორც ერთ დუბლში გადაღებულ ხანგრძლივ სცენებზე, ასევე გაწელილ დიალოგებზე, „გაუქმების კულტურის“ საფრთხეებზე საუბრებსა და სხვა თანამედროვე თემებზე.

The Second Act დიუპიეს სხვა ნამუშევრებისგან განსაკუთრებით გამოირჩევა უფრო მახვილი, თითქმის პამფლეტური იუმორით. ამ შემთხვევაში ეს არა უბრალოდ აბსურდის ესთეტიკური ატრაქციონია, როგორც ხშირად ხდება მის ფილმებში, არამედ ნამდვილად სახალისო და ჭკვიანურად აგებული კომედია. ეკრანზე პერსონაჟები კომიკურად ეკამათებიან ერთმანეთს, წარმოთქვამენ პათოსურ მონოლოგებს და უშედეგოდ ცდილობენ გადაღების პროცესს დაუბრუნდნენ.