ტაცუკი ფუძიმოტო: 17–26 / 2025

ექვსმა სხვადასხვა ანიმე-სტუდიამ და შვიდმა რეჟისორმა ეკრანზე გადაიტანა იაპონური საკულტო მანგაკას, Tatsuki Fujimoto-ს ადრეული ნამუშევრები (მათ შორის Look Back და Chainsaw Man). შედეგად მივიღეთ ანიმე-ანტოლოგია: თითოეული ეპიზოდი დამოუკიდებელი მოკლემეტრაჟიანი ისტორიაა, ყველა მათგანი ავტორმა 17-დან 26 წლამდე ასაკში მოიგონა და დახატა.

ისტორიები ერთმანეთთან კავშირში არ არის, მკვეთრად განსხვავდება ტემპითა და შინაარსით და ზოგჯერ სრულიად გიჟურადაც კი გამოიყურება. მაგალითად, პირველ სერიაში პლანეტა უცხოპლანეტელმა კაციჭამიებმა დაიპყრეს, ხოლო გადარჩენილი ადამიანები ქათმებად ასაღებენ თავს, რომ არ შეჭამონ. სხვა ისტორიაში კი არის ბიჭი, რომელსაც მუდმივად რაღაც აფერხებს: ხან მძარცველი ესხმის თავს, ხან უცხოპლანეტელი დედამიწის განადგურებას აპირებს — მაგრამ მას მათთვის არ სცალია, რადგან გოგოსთვის სიყვარულის აღიარებას გეგმავს.

ეს ანიმე-კრებული ჩვენი უახლესი აღმოჩენაა, რომელსაც კატეგორიულად გირჩევთ. სერიები გამოვიდა ONA ფორმატში (ანიმეები, რომლებიც პირდაპირ ონლაინ ვრცელდება) და თითქმის არ გაურეკლამებიათ, რის გამოც რელიზმა საკმაოდ ჩუმად ჩაიარა. თუმცა ჩვენი მოკრძალებული აზრით, ეს ნამდვილი ბომბაა. ორიოდე წელიწადში სერიალი საკულტოდ ჩაითვლება — და სწორედ მაშინ გაგახსენდებით. ჩვენ ხომ გითხარით!

ყველა სერია ერთად ორ საათზე მეტხანს გრძელდება, მაგრამ ეკრანს მოწყვეტა პრაქტიკულად შეუძლებელია.