,,ვერცხლმქანდაკებლობა IV-XIX საუკუნეების საქართველოში

,,ვერცხლმქანდაკებლობა IV-XIX საუკუნეების საქართველოში“ ვერცხლმქანდაკებლობას საქართველოში მრავალსაუკუნოვანი და უაღრესად საყურადღებო ისტორია აქვს. ვერცხლის ადრეული ნაკეთობები ადრებრინჯაოს ხანის მიწურულს ჩნდება და ამ დროიდან მხატვრულად მრავალფეროვანი ნიმუშები ეთნოგრაფიულ ყოფაშიც მტკიცედ მკვიდრდება. გამოფენაზე წარმოდგენილია საქართველოს ეროვნული მუზეუმის სიმონ ჯანაშიას სახელობის საქართველოს სახელმწიფო მუზეუმის კოლექციებში დაცული ვერცხლმქანდაკებლობის ნიმუშები, რომელთა ქრონოლოგიური ჩარჩო IV-XIX საუკუნეებით განისაზღვრება. პირველ დარბაზში გამოფენილია საქართველოს სხვადასხვა არქეოლოგიურ ძეგლზე აღმოჩენილი მატერიალური კულტურის ნიმუშები, კერძოდ, სამკაული: საკინძეები, ბეჭდები, საყურეები, სასაფეთქლეები, სამაჯურები, გულსაკიდი ჯვრები და ტანსაცმლის აქსესუარები. სამკაული, როგორც ადამიანის ყოფის განუყოფელი ნაწილი, წარმოაჩენს ამა თუ იმ ეპოქაში ქვეყნის კულტურულ, სოციალურ და ეკონომიკურ თავისებურებებს. ექსპოზიციაში, ვერცხლმქანდაკებლობის ნიმუშებთან ერთად, ამ პერიოდის ოქროსა და ბრინჯაოსგან დამზადებული სამკაულები თუ მონეტებიც არის წარმოდგენილი. ამავე დარბაზში გამოფენილია სიმონ ჯანაშიას სახელობის საქართველოს სახელმწიფო მუზეუმში დაცული ფრესკის პირები ისტორიულ პირთა პორტრეტული გამოსახულებებით. მათი ნაწილი დღეს უკვე ძლიერ დაზიანებული კედლის მხატვრობის ზუსტი ასლებია, ამიტომ, შეიძლება ითქვას, რომ მათ ორიგინალის მნიშვნელობა აქვს. ფრესკის ეს პირები შექმნეს გამოჩენილმა ქართველმა მხატვრებმა და მხატვარ-კოპიისტებმა. გამოფენაზე წარმოდგენილია ვარძიის, ბეთანიის, ლეხთაგის, მარტვილის, ზარათისა და წალენჯიხის ტაძრების მოხატულობებიდან გადმოღებული მეფე-დიდებულთა პორტრეტები თანადროული ეპოქისათვის დამახასიათებელი კოსტიუმებითა და სამკაულით. მეორე დარბაზში XII-XIX საუკუნეების ძვირფასი ლითონისაგან დამზადებული ექსპონატებია წარმოდგენილი, რომელთა უმეტესობა პირველად გამოიფინება. აქვეა ხელოვნების მუზეუმის ოთხი ფერწერული ტილო. გამოფენილია საქართველოს კუთხეების - სვანეთის, ხევსურეთის, თუშეთის, მთიულეთის, ფშავის, რაჭის, საინგილოს, აჭარის, ახალციხის და, ასევე, თბილისის ვერცხლმქანდაკებლობის ნიმუშებიც, ეკლესიებისთვის შეწირული ვერცხლის თასები, რომელთა წარწერები მნიშვნელოვან ისტორიულ ფაქტებსა და მოვლენებს გვაუწყებს.