ქეთი კაპანაძე: "საწამლავი წყვილისთვის"

1990-იანი წლების დასაწყისში გადაღებულ კონცეპტუალურ ფოტოსერიასთან ერთად, გამოფენაზე წარმოდგენილი იქნება 1980-იანი წლების ნახატების სერია Anima Ex Machina - ქაღალდზე შავი გუაშით შესრულებული ნამუშევრები და ტექსტები, რომელთა შესრულებაც კაპანაძემ ავტომატური წერის სავარჯიშოს პრინციპით დაიწყო. ქაღალდის შემდეგ მან მუშაობა მუყაოზე გააგრძელა, ის შავი გუაშით დაფარა და ამ ფონზე თეთრი საღებავით ტექნიკური ნახაზები და დიაგრამების ტიპის ნამუშევრები დახატა. ხელოვანის აზრით, შავი სიბრტყე ის სივრცეა, რომელშიც ყველა ინფორმაცია “ინახება”, ამ სიშავიდან ამოტივტივებული დიაგრამები და ციფრები კი რებუსების მსგავსი ნახატების ფორმას იღებს. ქეთი კაპანაძემ სერია 1980-იან წლებში შეასრულა, თუმცა მისი ნაწილი მაშინ დაიკარგა. მოგვიანებით ნამუშევრების ფოტოებიდან განმეორებითი აღდგენა და სერიისთვის ახალი ნაწილის დამატება 2003-2004 წლებში მოხდა. გამოფენაზე ასევე იქნება წარმოდგენილი რამდენიმე ფერწერული ტილო 2010 წლის სერიიდან “აკაშას ქრონიკები”.   ქეთი კაპანაძემ შემოქმედებითი მოღვაწეობა თბილისში 1980-იან წლებში დაიწყო. ის მეათე სართულისა და მარჯანიშვილელების თაობაა, თუმცა ის ამ დაჯგუფებების წევრი არასდროს ყოფილა. მიუხედავად იმისა, რომ ამ ჯგუფების პარალელურად საქართველოში იმ პერიოდში მხოლოდ რამდენიმე ქალი ხელოვანი მუშაობდა, მათ გამოფენებში მონაწილეობის მისაღებად იშვიათად იწვევდნენ. ქეთი კაპანაძე ერთ-ერთი პირველი ფემინისტი ხელოვანია, რომელიც თავისი იდენტობის კვლევასა და დეფინიციას 1980-იანი წლების ბოლოსა და 1990-იანების დასაწყისში შესრულებული კონცეპტუალური ფოტოების სერიით შეეცადა. მისივე სიტყვებით “ობიექტებს აჩვენებ და შენ იკარგები, ინფორმაციას არ იძლევი და ამ დროს ფოტოებზე აღბეჭდილი ნივთებით ეუბნები ყველაფერს.”   ქეთი კაპანაძეს ხშირად აქვს გამოფენები გერმანიაში, სადაც ის Baumann Stiftung-ის დახმარებით 2000 წელს გადასახლდა. ის იყო Johannes Gutenberg University-ის (მაინცი, გერმანია) მიწვეული პროფესორი, მოგვიანებით 2020 და 2021 წლებში კი თავისუფალი უნივერსიტეტის, VAADS-ის სადიპლომო პროექტების ხელმძღვანელი.   ქეთი კაპანაძე ცხოვრობს და მუშაობს გერმანიასა და საქართველოში.   მარჯანიშვილის 7, თიბისი კონცეპტის სივრცე სამუშაო საათები :ორშაბათი-შაბათი: 10:00-20:00 გამოფენის ხანგრძლივობა:10.04-30.05.2024