ფსიქოანალიტიკური დიალოგები თბილისში

კონფერენცია განკუთვნილია კვალიფიციური ფსიქოანალიტიკოსებისათვის, კანდიდატებისა და ფსიქოდინამიური მიდგომით მომუშავე კლინიკოსებისათვის, აგრეთვე სტუდენტებისათვის, რომლებიც ფსიქოანალიზის შესწავლით არიან დაინტერესებულნი.
კონფერენციის ფარგლებში მოისმენთ ენდელ ტალვიკისა და იგორ კადიროვის ორ გამორჩეულ მოხსენებას (სათაურები მოგვიანებით გამოცხადდება). მოხსენებების დასრულების შემდეგ ავტორებს შორის დაიწყება დიალოგი, რომელიც ბუნებრივად გადაიზრდება აუდიტორიასთან აქტიურ და ჩართულ კომუნიკაციაში. ეს იქნება კონცეპტუალური განხილვისა და კლინიკური ნააზრევის გაცვლის უნიკალური შესაძლებლობა. კონფერენცია უზრუნველყოფს საკმარის სივრცეს როგორც კითხვებისა და დისკუსიისთვის, ისე მონაწილეთა არაფორმალური შეხვედრებისთვის.
კონფერენცია ნახევრად ხუმრობით დავასათაურეთ როგორც „გზა ‘East Lodge’-ისკენ“. თავისი ფორმითა და შინაარსით იგი მეტ-ნაკლებად იმეორებს West Lodge-ის ფორმატს, რომელიც სამი ათეული წლის წინ ჩამოყალიბდა ჩრდილო ლონდონის განაპირა უბანში, სახელწოდებით West Lodge, სამი მსოფლიოში აღიარებული კლაინიანელი ანალიტიკოსის — რონალდ ბრიტონის, ჯონ სტაინერისა და მაიკლ ფელდმანის — მიერ.
კონფერენციის სათაურში გაჟღერებული, ერთი შეხედვით გაუგებარი ტოპონიმი „East Lodge“ / "აღმოსავლეთის ლოჟა"გამოხატავს იმ იდეასა და მოლოდინს, რომ „აღმოსავლეთის ლოჟის“ მეშვეობით დაიწყოს გზის გაკვალვა და გადაიდგას პირველი ნაბიჯები კლინიკური და კონცეპტუალური ფსიქოანალიტიკური რეფლექსიის სივრცისკენ იმ რეგიონში, რომელსაც საკმაოდ პირობითად ვუწოდებთ „აღმოსავლეთ ევროპას“. 
დეტალური ინფორმაცია იხილეთ ბმულზე:

https://gppo.ge/en/psychoanalyticdialoguesintbilisi