პორკო როსო

იტალიელი ასი, მეტსახელად პორკო როსო — პირველი მსოფლიო ომის გმირი და ქალების გულთამპყრობელი, რომელმაც უარი თქვა დუჩეს სამსახურზე — ადრიატიკის ზემოთ დასეირნობს თავის ალ წითელ ჰიდროპლანზე, მელანქოლიურად უგულებელყოფს ხელისუფლების მცდელობებს დააკავოს იგი „მამულის ღალატის, საზღვრების დარღვევის, დეგენერატიზმის, პორნოგრაფიისა და ღორობის“ ბრალდებით.

„პორკო როსო“ თავდაპირველად დაგეგმილი იყო როგორც მოკლემეტრაჟიანი ფილმი, რომელიც უნდა ეჩვენებინათ Japan Airlines-ის რეისებზე, მაგრამ ჰაიაო მიაძაკიმ შეცვალა ჩანაფიქრი და გადაიღო სრულმეტრაჟიანი ანიმაცია იტალიელი სამხედრო მფრინავის შესახებ, რომელიც ფაშიზმის აღმავლობის გამო ტოვებს არმიას და თავისუფალ მფრინავად იქცევა.

მიუხედავად ბნელი კონტექსტისა და არა ბავშვური სიუჟეტისა, „პორკო როსო“ ნამდვილი ვიზუალური ფეერიაა: შთამბეჭდავი საჰაერო ბრძოლები იშლება ზღაპრულ ხმელთაშუა ზღვის პეიზაჟებზე.