ნოემბერი

ვუყურებთ შემზარავ და ამავდროულად ულამაზეს ფოლკლორულ ზღაპარს ესტონეთიდან.

ესტონეთის მიყრუებული სოფელი. ადგილობრივი გლეხებისთვის მაგია და წარმართული რიტუალები ყოველდღიური ცხოვრების სრულიად ჩვეულებრივი ნაწილია. ყველა წმინდანის დღეს მიცვალებულები ბრუნდებიან, რათა აბანოში გაორთქლდნენ და შავი პური მიირთვან. ჭირი ღორად გარდაისახება, რათა ადამიანებთან გარიგება დადოს.

რა თქმა უნდა, სიყვარულის ისტორიაც არ გვაკლია: სოფლელ გოგონას, ლიინას, მეზობელი ბიჭი ჰანსი უყვარს, მაგრამ ჰანსი მდიდარი მემამულის ქალიშვილზეა შეყვარებული. ამიტომ ლიინა გადაწყვეტს, დახმარებისთვის ჯადოქარს მიმართოს.

მოკლედ, „ნოემბერი“ (November) ნამდვილი ქთონური სამყაროა — პირველყოფილი, მიწიერი, ბნელი და შემზარავი, თითქოს თავად მიწის წიაღიდან ამოზრდილი.

ამასთანავე, ფილმი საოცარი სიზუსტით გადმოსცემს ხალხური, დაბალი ფენების კულტურის სულისკვეთებას — სამყაროს, რომელიც ერთდროულად საზიზღარიცაა და მომაჯადოებელიც.

ესტონეთში „ნოემბერი“ 2017 წლის საუკეთესო ფილმად აღიარეს. ის ასევე წარადგინეს „ოსკარზე“ განსახილველად, თუმცა საბოლოო ნომინანტებს შორის ვერ მოხვდა.