ახალი ცხოვრება

ინოვაციური, ტაქტილური ფილმი ახალგაზრდა ამერიკელზე, რომელიც ბულგარეთში ეძებს იდუმალ და მშვენიერ მეძავს. ფილმი დაფუძნებულია არა სიუჟეტსა და დიალოგებზე, არამედ კანის ქვეშ ჩამწვდომ ხმოვან და სხეულობრივ იმპულსებზე. გრანრიეს ფილმები სავსეა ხმებით – ყვირილი, კვნესა, სუნთქვა, ხრინწი და, რაც ყველაზე მნიშვნელოვანია – მუსიკა: „ახალ ცხოვრებაში“ ერთმანეთზე ეჯახება შიშინ-დაბინდული ინდუსტრიული რიტმები, სენტიმენტალური მელოდიები და დისკოთეკების გამაყრუებელი ბითები.

ფილიპ გრანრიე:
„ხმა და მუსიკა განსაკუთრებულ მნიშვნელობას იძენს ჩემს ფილმებში. „ახალი ცხოვრების“ ხმა გაჩნდა ბევრად ადრე, ვიდრე გამოსახულება. როცა ერიკ გიიართან ერთად სცენარის პირველი ვერსია დავამთავრეთ, ის ჯგუფ Etant Donné-ს გავუგზავნე, და მათ დაიწყეს მუსიკის ჩაწერა მაშინ, როცა კადრებიც კი არ გვქონდა. ჩვენ სწორედ ამ ჩანაწერს ვიყენებდით გადაღებისას. ეს ხმა ერთგვარი ექოა „დიდი აფეთქებისა“, რაც სამყაროს შექმნას უძღოდა წინ – კატასტროფის ნაშთი, რომლის მოწმენიც არ ვყოფილვართ, მაგრამ რომლის ექოც კი შეგვიძლია გავიგონოთ.“

ფილმის შემდეგ ვიხარშავთ ჩაის და ვუზიარებთ ერთმანეთს შთაბეჭდილებებს. შეხვედრას გაუძღვება ფილოსოფოსი და კინომცოდნე (და კინოთეატრის თანადამფუძნებელი) ვარია ვლასოვა.