იოსებ სტალინის სახელმწიფო მუზეუმი

ი.ბ. სტალინის სახელმწიფო მუზეუმი მდებარეობს გორში, ქალაქში,სადაც ის დაიბადა. სამუზეუმო კომპლექსი 1957 წელს სტალინის გარდაცვალების შემდეგ გაიხსნა. თუმცა იმ სახლში, სადაც სტალინი დაიბადა, მემორიალური მუზეუმი ჯერ კიდევ 1937 წლიდან მის სიცოცხლეშივე არსებობდა. ორსართულიანი საექსპოზიციო შენობა კოშკით არქიტექტორ არჩილ ქურდიანის პროექტით აშენდა. მუზეუმის შენობა მოპირკეთებულია ეკლარის ქვით.

სვეტები შემკულია ჩუქურთმებითა და ორნამენტებით. წითელი მარმარილოთია მოპირკეთებული ვესტიბიული. ი.ბ. სტალინის სახელმწიფო მუზეუმის კომპლექსის შემადგენლობაში შედის მემორიალური სახლი (სადაც სტალინი დაიბადა) , სტალინის ვაგონი და ორსართულიანი საექსპოზიციო დარბაზი. საექსპოზიციო შენობის წინ დგას მოქანდაკე სილოვან კაკაბაძის მიერ შესრულებული სტალინის ქანდაკება. მუზეუმში თავმოყრილია შემდეგი ექსპონატები: მემორიალური ნივთები, საჩუქრები, ფერწერული ტილოები, ფოტო- კინო დოკუმენტები. დაცულია იმ ეპოქის ამსახველი ისტორიული მასალა, რომელშიც მოღვაწეობდა სტალინი. სტალინის ცხოვრებისა და მოღვაწეობის ამსახველი სტაციონარული ექსპოზიცია მუზეუმის ექვს დარბაზშია განთავსებული. პირველ დარბაზში განთავსებული ექსპოზიცია ასახავს სტალინის რევოლუციამდე და რევოლუციური მოღვაწეობის პერიოდს.

მეორე დარბაზში 1925-1940 წწ საბჭოთა ქვეყნის ისტორიის პერიოდია ასახული. აქ ისტორიული მოვლენების ფონზე ნაჩვენებია ი.ბ. სტალინის ხელმძღვანელობით ბრძოლა ქვეყნის განვითარებისათვის.

მესამე დარბაზში მეორე მსოფლიო ომის ამსახველი ფოტო- დოკუმენტებია წარმოდგენილი. განსაკუთრებული კუთხე აქვს დათმობილი თეირანის, იალტის, და პოტსდამის კონფერენციებს, გამოფენილია ი.ბ. სტალინის ერთ-ერთი საინტერესო ფოტო რეტუშის გარეშე. ამავე დარბაზში ცალკე კუთხე აქვს დათმობილი ი.ბ. სტალინის პირად ცხოვრებას. მეოთხე დარბაზში მარმარილოს სვეტებს შორის მოთავსებულია ი.ბ. სტალინის გარდაცვალების შემდეგ აღებული ბრინჯაოს ნიღაბის მეექვსე ეგზემპლარი. ნიღაბი აუღია ცნობილ მოქანდაკეს მ. მანიზერს. ამავე დარბაზში მოთავსებულია საბჭოთა კავშირის სახალხო მხატვრის უჩა ჯაფარიძის მხატვრული ტილო „ი.ბ. სტალინი კუბოში“ მუზეუმის მეხუთე საგამოფენო დარბაზი მთლიანად დათმობილი აქვს ი.ბ. სტალინის საჩუქრებს.

მეექვსე დარბაზში განთავსებულია სტალინის პირველი სამუშაო კაბინეტი, სადაც მუშაობდა 1918- 1922 წლებში და მისი მემორიალური ნივთები. ცალკე ოთახი აქვს დათმობილი რეპრესიების პერიოდს. რეპრესიების ოთახი მუზეუმში 2010 წლიდან მოქმედებს.

ი.ბ. სტალინის სახელმწიფო მუზეუმის კომპლექსის საერთო ფართობია 3529.7 კვ/მ, მუზეუმის ფონდში ამჟამად 40000-ზე მეტი ექსპონატი, დოკუმენტი, მხატვრული ტილო და დამხმარე სამუზეუმო მასალაა დაცული. მუზეუმში მოქმედებს შიდა სამეცნიერო ბიბლიოთეკა. ი.ბ.სტალინის სახელმწიფო მუზეუმს ექსპონატების დიდი ნაწილი გადმოსცა მოსკოვის ისტორიისა და რევოლუციის მუზეუმმა.

უფასო საშვები მხოლოდ ადგილზე შესაბამისი საბუთის წარდგენის შემთხვევაში:

• II მსოფლიო ომის მონაწილეებსა და მათთან გათანაბრებული პირებისათვის
• ICOM- ის წევრებსა და საქართველოს მუზეუმების თანამშრომლებისათვის.
• I და II ჯგუფის ინვალიდებისათვის.
• მზრუნველობამოკლებული ბავშვებისათვის.
• სიღარიბის ზღვარსმიღმა მყოფი პირებისათვის.
• მრავალშვილიანი და მარტოხელა დედებისათვის.
• იძულებით გადაადგილებული და ოკუპირებული ტერიტორიის მოსაზღვრე სოფლებში მცხოვრები პირებისათვის.
• პედაგოგი.
• პენსიონერი.
• ჯარისკაცებისათვის.
• 6 წლამდე ბავშვებისთვის მუზეუმში შესვლა უფასოა.

სამუშაო საათები:

ი.ბ. სტალინის სახელმწიფო მუზეუმი მუშაობს ყოველდღე 10:00-დან 18:00 საათამდე.

1 ნოემბრიდან 1 აპრილამდე მუზეუმი ვიზიტორს მიიღებს 10:00-დან 17:00 საათამდე.

რჩევები და წესები:

• დამთვალიერებელმა ბილეთი უნდა შეინახოს ვიზიტის ბოლომდე და მოთხოვნის შემთხვევაში ხელახლა წარუდგინოს შესაბამის პირს.
• დამთვალიერებლებმა, რომლებიც სარგებლობენ შეღავათიანი ტარიფით ან უფასო შესვლის უფლებით, სალაროსთან უნდა წარადგინონ შესაბამისი საბუთი.
• შეძენილი ბილეთი დაბრუნებას არ ექვემდებარება.
• ჯგუფის ხელმძღვანელები პასუხისმგებლები არიან მათი ჯგუფის წევრების საქციელზე.
• იკრძალება ექსპონატებზე ხელით შეხება.
• მუზეუმის შენობასა და მუდმივ ექსპოზიციებში კერძო მიზნებისთვის ფოტოგადაღება ნებადართულია ბლიცისა და ფოტოშტატივების გამოყენების გარეშე
• ფოტო და ვიდეოგადაღება დროებით გამოფენებზე კატეგორიულად დაუშვებელია.
• გადაღება კომერციული მიზნებისთვის დასაშვებია მხოლოდ მუზეუმის ადმინისტრაციასთან შეთანხმებისა და წერილობითი ნებართვის საფუძველზე.
• ნებისმიერი ჩანაწერი ან ფოტო, სადაც შესაძლოა გამოჩნდეს მუზეუმის თანამშრომელი, საჭიროებს მუზეუმის ადმინისტრაციის თანხმობას.