გურანდა ქლიბაძის გამოფენა "მეფეები და სამეფო ბაღები"

"იმ შემოქმედებით ველზე, რომელზედაც გურანდა ქლიბაძე მოძრაობს, მისი მხატვრობის ობიექტები ნაღმებივით ფეთქდებიან - ისეთი ძალით გადმოსცემს მხატვარი მათში არსებულ ენერგიას და რესურსს. თითქოს ჩვენ თვალწინ იშლება და იფურჩქნება ყვავილი, რომელსაც ხატავს; ცხენის მთრთოლარე სხეული რბოლის სისწრაფეს აფრქვევს; გადახლართული ფიგურებით გამოსახული “ადამი და ევა” და “მედეა და იასონი” წყვილის საბედისწერო გადაჯაჭვულობას განასახიერებენ; მედეას გაქცევით გაოგნებული აიეტის სხეული ჩირაღდანივით იწვის. დიადი თემებია, რომლის გადმოსაცემად მხატვარი ქაღალდის დიდ ფორმატს და გაბედულად მოქნეულ ფუნჯის მონასმს, ტიპოგრაფიული საღებავის მინანქრისებურ ფაქტურას და მონოტიპიის რთულ ტექნიკას ირჩევს. მისი მომნუსხველი და ჯადოსნური ბაღები ორაკულების ადგილსამყოფელს მოგვაგონებენ, მისტერიების ადგილს, ფიგურები - მითოლოგიურ პერსონაჟებს, მოქმედებები - რიტუალებს. მარადიული თემებია ან ამ თემებთან დაკავშირებული მოტივები. ამიტომ მის ნახატებში მარადიული ენერგიები ტრიალებს, რომელთა ნაკადში გახვეული მხატვარი ეგზისტენციალურ საიდუმლოებებს გვიზიარებს".   ბაია წიქორიძე