Dust Bunny

ბრაიან ფულერმა და მადს მიკელსენმა „ჰანიბალის“ საშუალებით ტელევიზიის ისტორიაში ერთ-ერთი ყველაზე გამორჩეული შემოქმედებითი ტანდემი შექმნეს. ათ წელზე მეტი ხნის შემდეგ ისინი კვლავ ერთად ბრუნდებიან.

ათი წლის ავრორა დარწმუნებულია, რომ მისი საწოლის ქვეშ მცხოვრებმა მონსტრმა მთელი მისი ოჯახი შეჭამა. ამიტომ დახმარებისთვის იდუმალ მეზობელს მიმართავს, რათა მონსტრი მოკლას. მხოლოდ ერთი პრობლემაა — მისი მეზობელი მონსტრებზე მონადირე კი არა, პროფესიონალი მკვლელია. მათ შორის მოულოდნელი მეგობრობა იბადება, ხოლო ისტორია, რომელიც თავიდან ბნელ ზღაპარს ჰგავს, მალე მკვლელების, ბავშვობის ტრავმებისა და იმ შემაშფოთებელი შესაძლებლობის უცნაურ შეჯახებად იქცევა, რომ ზოგიერთი მონსტრი მართლაც არსებობს.

„Dust Bunny“ ბრაიან ფულერის პირველი სრულმეტრაჟიანი სარეჟისორო ნამუშევარია. ფილმი ჰორორს, ფენტეზის, ექშენსა და შავ იუმორს აერთიანებს იმავე გამორჩეული ვიზუალური სტილით, რომელმაც თავის დროზე „Pushing Daisies“ და „Hannibal“ საკულტო სერიალებად აქცია. თუმცა მის გულში საოცრად თბილი ისტორია იმალება მწუხარებაზე, დანაშაულის გრძნობასა და იმედის პოვნაზე ყველაზე მოულოდნელ ადგილებში.

მადს მიკელსენი კვლავ შესანიშნავ ფორმაშია — საოცარი სიზუსტით აერთიანებს საშიშ აურას, მელანქოლიასა და მისთვის დამახასიათებელ მშრალ იუმორს. ახალბედა მსახიობი სოფი სლოანი კი იმდენად შთამბეჭდავია, რომ მისმა შესრულებამ კრიტიკოსების ფართო აღიარება უკვე დაიმსახურა. უცნაური, გამბედავი და ამ რეტროსპექტივის ყველა სხვა ფილმისგან სრულიად განსხვავებული „Dust Bunny“ იდეალურად ასრულებს MADSNESS-ს და კიდევ ერთხელ ადასტურებს, რომ სამი ათწლეულის შემდეგაც კი მადს მიკელსენი ახალ და მოულოდნელ გზებს პოულობს, რათა მაყურებელი გააოცოს.