ანსამბლების „იბერია“ და „ნენსკრა“ კონცერტი

12 ოქტომბერს, 20:00 საათზე, მესტიის კულტურისა და ხელოვნების ცენტრში გაიმართება ქართული ხალხური სიმღერისა და საკრავთა ანსამბლ „იბერიას“ კონცერტი ადგილობრივ ფოლკლორულ ანსამბლ „ნენსკრასთან“ ერთად.

საღამოზე შესრულდება საქართველოს სხვადასხვა კუთხის ტრადიციული სიმღერები და ხალხური საკრავების თანხლებით წარმოდგენილი მუსიკალური ნომრები.

ანსამბლი „იბერია“ მოღვაწეობს ქართული საბრძოლო ხელოვნების ეროვნული ფედერაცია „ხრიდოლთან“ არსებულ ამავე სახელწოდების სტუდიაში, რომელიც 2014 წელს დაარსდა. ანსამბლი არაერთი კონკურსის გამარჯვებული და პრიზიორია და აქტიურად მონაწილეობს მუსიკალურ კონკურსებსა და ფესტივალებში საქართველოში და საზღვარგარეთ.

„იბერიას“ ხელმძღვანელები არიან ეკატერინე ხუცოშვილი და ლევან გუშარაშვილი. ანსამბლს უმასპინძლებს და საკონცერტო პროგრამაში მონაწილეობას მიიღებს ფოლკლორული ანსამბლი „ნენსკრა“, ლალი ჩხეტიანის ხელმძღვანელობით.