დანაშაულზე წასწრებული

1990-იანი წლების დასასრული. ყოფილი ბეისბოლის მოთამაშე ჰენკი (ოსტინ ბატლერი) ნიუ-იორკში ბარმენად მუშაობს, ბევრს სვამს და ხანდახან ივონთან (ზოი კრავიცი) ატარებს ღამეს. ყველაფერი მაშინ იცვლება, როდესაც მისი პანკი მეზობელი სთხოვს, რამდენიმე დღით კატას მიხედოს. მეორე დღეს კი ჰენკის ცხოვრებაში ორი რუსი კრიმინალი — ლეხა და მიკრობი (იური კოლოკოლნიკოვი და ნიკიტა კუკუშკინი) ჩნდება. ამის შემდეგ მის კარზე ერთმანეთის მიყოლებით აკაკუნებენ სულ უფრო უცნაური და სახიფათო სტუმრები — ებრაელი მაფიოზებიდან დაწყებული, აზარტული თამაშების ბუკმეიკერებითა და კორუმპირებული პოლიციელებით დასრულებული.

მოულოდნელად (თითქოს საკუთარი თავისთვისაც) დარენ არონოფსკიმ კრიმინალური თრილერი გადაიღო, მაშინ როცა აქამდე სრულიად სხვა ჟანრის ფილმებით იყო ცნობილი — „რეკვიემი ოცნებისთვის“ და „ვეშაპი“. არონოფსკიმ შექმნა მთავარი გმირი, რომელიც წინააღმდეგობრივი, მაგრამ სრულიად გასაგებია: მას პრობლემური ოჯახი, თვითდესტრუქციული ქცევა და ჩვეულებრივი ყოველდღიური სირთულეები აქვს. ერთი მხრივ, უხეში, ჯიუტი და თავდაჯერებულია, მეორე მხრივ კი — შინაგანად ძალიან მგრძნობიარე. ოსტინ ბატლერის ქარიზმა კი საკმარისია იმისთვის, რომ მაყურებელმა თვალი ვერ მოსწყვიტოს მის დაძაბულ დევნასა და თავგადასავლებს.