BOTTOMS

Emma Seligman-ის Bottoms თავიდან წარმოდგენილი იყო როგორც დაუნდობელი ჰაი-სქულ კომედია, მაგრამ ეს აღწერა მხოლოდ ნაწილობრივ ასახავს ფილმის არსს. დიახ, სიუჟეტი აბსურდულია — ორი გოგონა აწყობს ფაით-კლუბს იმისთვის, რომ უფრო დაუახლოვდნენ იმ ჩირლიდერებს, რომლებზეც გატაცებულები არიან — თუმცა ფილმი ყველაზე სასაცილო ხდება მაშინ, როცა მას ნაკლებად აღიქვამ როგორც ახალგაზრდულ ფილმს და უფრო — როგორც ზრდასრული კომედიური სიგიჟის ნიმუშს. მისი ხუმრობები უხეშია, აგრესიული, შეგნებულად „სულელური“ და ისეთი სიზუსტით მიწოდებული, რომ საბოლოოდ ფილმი უფრო თინეიჯერული ჟანრის პაროდიას ჰგავს, ვიდრე მის პირდაპირ წარმომადგენელს.

ფილმის მთავარი ხიბლი დიდწილად მსახიობებშია. Rachel Sennott შესანიშნავია, ხოლო Ayo Edebiri — რომელსაც ბევრი მაყურებელი იცნობს The Bear-იდან — იდეალურად აერთიანებს პანიკას, უხერხულობას და სრულ ჩართულობას. მათ ირგვლივ ანსამბლი ზუსტად გრძნობს ფილმის ტონს, რის გამოც ის რაც უფრო აბსურდული ხდება, მით უფრო სასაცილოცაა.

იმის შემდეგ, რაც Shiva Baby-მა გასულ კვირას ასეთი წარმატებით ჩაიარა, სრულიად ლოგიკური აღმოჩნდა სელიგმანის ახალი კომედიის ჩვენებაც. თუ SHIVA BABY თავის პერსონაჟებს სოციალური შფოთვისა და დაძაბულობის „ქვაბში“ ამწყვდევს, BOTTOMS უფრო ფართო, ხმაურიანი და აშკარად აბსურდულია — თუმცა მის ქვეშ მაინც იგრძნობა იგივე კომედიური ინტელექტი.