წიგნები და მუსიკა: საღამო გამომცემლობა „ბაბელთან“ და ჯგუფ ICE HOKKU-სთან (თელ-ავივი)

წიგნები და მუსიკა: საღამო გამომცემლობა „ბაბელთან“ და ჯგუფ ICE HOKKU-სთან (თელ-ავივი)

22 ოქტომბერს „აუდიტორიაში“ გაიმართება ლიტერატურულ-მუსიკალური საღამო თელ-ავივის ორი პროექტის მონაწილეობით — წიგნის მაღაზია და გამომცემლობა „ბაბელი“ და ინდი-პოპ დუეტი Ice Hokku.

პროგრამაშია საუბარი თანამედროვე საგამომცემლო საქმიანობაზე, ახალი წიგნების პრეზენტაცია და კამერული კონცერტი.

 პირველი ნაწილი — შეხვედრა ევგენი და ლენა კოგანებთან, წიგნის მაღაზია და გამომცემლობა „ბაბელის“ დამფუძნებლებთან

„ბაბელი“ 2015 წელს თელ-ავივში გაიხსნა, როგორც დამოუკიდებელი რუსულენოვანი წიგნის მაღაზია. დროთა განმავლობაში ის კულტურულ სივრცედ იქცა, სადაც იმართება ლექციები, გამოფენები და შეხვედრები მწერლებთან. მოგვიანებით კი საკუთარი გამომცემლობაც დააარსა.

დღეს „ბაბელი“ გამოსცემს თანამედროვე პროზას, პოეზიასა და ჰუმანიტარულ ლიტერატურას, ასევე მკითხველს ხელახლა აცნობს XX საუკუნის უსამართლოდ მივიწყებულ ნაწარმოებებს.

შეხვედრაზე ევგენი და ლენა გამომცემლობის ახალ წიგნებს წარადგენენ, მათ შორის არმენ ზახარიანის „ბნელი ადამიანების წერილებს“ (Письма тёмных людей), ვიქტორ ვახშტაინის „სმონგს“ (Смонг) და სხვა გამოცემებს.

ვისაუბრებთ დამოუკიდებელ საგამომცემლო საქმიანობაზე, ავტორების შერჩევის პროცესსა და იმაზე, თუ როგორ მუშაობს რუსულენოვანი წიგნის მაღაზია რუსეთის ფარგლებს გარეთ. სტუმრებს ასევე ექნებათ შესაძლებლობა, დასვან მათთვის საინტერესო კითხვები.

 მეორე ნაწილი — თელ-ავივის ინდი-პოპ დუეტის Ice Hokku-ს კონცერტი

Ice Hokku მუსიკალური პროექტია, რომელიც 2017 წელს ვოკალისტმა იულია გარნიცმა და გიტარისტმა ანტონ დმიტრიევმა დააფუძნეს. დუეტის მუსიკა აერთიანებს ინდი-პოპს, ელექტრონულ მუსიკას, როკსა და ახლო აღმოსავლეთის მუსიკალური ტრადიციების ელემენტებს.

არსებობის განმავლობაში მუსიკოსებმა კონცერტები გამართეს ევროპაში, ცენტრალურ აზიაში, იაპონიასა და ვიეტნამში.

Ice Hokku-ს ცოცხალი შესრულებების ერთ-ერთი გამორჩეული თავისებურება ლუპ-სტაციების გამოყენებაა, რაც მუსიკოსებს საშუალებას აძლევს, უშუალოდ კონცერტის დროს ჩაწერონ და ერთმანეთზე დაადონ სხვადასხვა მუსიკალური პარტია. ასე გიტარის მელოდიების, სინთეზატორების, ელექტრონული რიტმებისა და ვოკალის შერწყმით თანდათან იქმნება მრავალშრიანი მუსიკალური კომპოზიციები.

„აუდიტორიაში“ მუსიკოსები თავიანთ რჩეულ სიმღერებს კამერულ ფორმატში შეასრულებენ.