BEFORE THE GUN GOES OFF...

„Before the Gun Goes Off...“ შრი-ლანკელი დამოუკიდებელი რეჟისორის პავით სივაკუმარისსადებიუტო სრულმეტრაჟიანი ფილმია, რომელიც მთლიანად თბილისში, შვიდი თვის განმავლობაში, მრავალეროვანი შემოქმედებითი ჯგუფის მიერ, ტრადიციული სტუდიური სისტემის მიღმა შეიქმნა.

ფილმი ინგლისურ ენაზეა გადაღებული, ხოლო მსახიობები და შემოქმედებითი ჯგუფი სხვადასხვა ქვეყნისა და კულტურის წარმომადგენლებს აერთიანებს. ეს არის დამოუკიდებელი საერთაშორისო პროექტი, რომელიც ენთუზიაზმის, შეუპოვრობისა და თანამშრომლობის შედეგად განხორციელდა.

ფილმის მთავარი გმირები ორი სრულიად განსხვავებული ადამიანია. კრისი მოჭადრაკეა, რომელსაც ჯერ არც ერთი პარტია არ მოუგია, ხოლო ჰანსი წარმატებული და მდიდარი კინორეჟისორია, რომლის ცხოვრება კრისისთვის მიუწვდომელ ოცნებად ჩანს. სიუჟეტის განვითარებასთან ერთად ფილმი გვიჩვენებს, რომ წარმატებისა და გარეგნული კეთილდღეობის მიღმაც შეიძლება იმალებოდეს მარტოობა, საკუთარ თავთან ბრძოლა და ღრმა შინაგანი კრიზისი.

ფსიქოლოგიური თრილერის ელემენტებისა და არახაზოვანი თხრობის საშუალებით, ფილმი ეტაპობრივად ხსნის პერსონაჟების შინაგან სამყაროს და მაყურებელს უბიძგებს თავად აღმოაჩინოს, როგორ უკავშირდება ერთმანეთს ისტორიის სხვადასხვა ნაწილი. ფილმის მთავარი თემებია იდენტობა, აღქმა, ფსიქოლოგიური თავდაცვის მექანიზმები და ადამიანის ფსიქიკის სირთულე.

თბილისში შექმნილი ეს საერთაშორისო დამოუკიდებელი ნამუშევარი არა მხოლოდ საინტერესო ფსიქოლოგიურ თრილერს გვთავაზობს, არამედ შესაძლებლობასაც იძლევა, მხარი დავუჭიროთ ახალგაზრდა კინემატოგრაფისტებს, რომლებიც ქალაქის მზარდ შემოქმედებით გარემოს ქმნიან.