ვოკალური მუსიკის საღამო | ოთარ ჯორჯიკია, ნინო სურგულაძე, რევაზ ჯავახიშვილი

მანანა დოიჯაშვილის სახელობის XXVIII საერთაშორისო ფესტივალი „საახალწლო მუსიკალური შეხვედრები“ ვოკალური მუსიკის საღამოს გთავაზობთ.

15 დეკემბერს, 19:00 საათზე, თბილისის ვანო სარაჯიშვილის სახელობის სახელმწიფო კონსერვატორიის დიდ დარბაზში, სცენაზე გამოვლენ ტენორი ოთარ ჯორჯიკია, მეცო-სოპრანო ნინო სურგულაძე და დირიჟორი რევაზ ჯავახიშვილი. მათთან ერთად გამოვა თბილისის ზაქარია ფალიაშვილის სახელობის ოპერისა და ბალეტის სახელმწიფო თეატრის სიმფონიური ორკესტრი.

ოთარ ჯორჯიკია (ტენორი). თბილისში დაბადებული ქართველი ტენორი, საერთაშორისო საოპერო კარიერით. მის რეპერტუარში მნიშვნელოვანი ადგილი უჭირავს ვერდის, პუჩინისა და ფრანგული ოპერის წამყვან ტენორულ პარტიებს. სწავლობდა თბილისის სახელმწიფო კონსერვატორიაში, ვენასა და ციურიხის ოპერის საერთაშორისო სტუდიაში. გამოსულია მილანის ლა სკალაში, სიდნეის ოპერის თეატრში, ციურიხის ოპერაში, მოსკოვის დიდ და სანქტ-პეტერბურგის მარიინსკის თეატრებში, ბრეგენცის ფესტივალზე. 2016 წელს გალინა ვიშნევსკაიას საერთაშორისო ვოკალურ კონკურსზე და გრაცის Belcanto Academy-ის კონკურსზე პირველი პრემია და გრან-პრი მოიპოვა. სცენაზე პარტნიორობდა პლასიდო დომინგოს, რენე პაპეს, ანა ნეტრებკოს, სონდრა რადვანოვსკისა და სხვებს.

ნინო სურგულაძე (მეცო-სოპრანო). თბილისში დაბადებული ქართველი მეცო-სოპრანო, საერთაშორისო საოპერო კარიერით, რომელიც თბილი, ხავერდოვანი ხმითა და გამორჩეული სამსახიობო ოსტატობით გამოირჩევა. თბილისის სახელმწიფო კონსერვატორიისა და მილანის ლა სკალას აკადემიის კურსდამთავრებულია. წამყვანი პარტიები შეასრულა ლა სკალაში, ნიუ-იორკის მეტროპოლიტენ ოპერაში, ლონდონის სამეფო ოპერის თეატრში, მიუნხენის ბავარიის სახელმწიფო ოპერასა და ვერონის არენაზე, ასევე ზალცბურგისა და გლაინდბორნის ფესტივალებზე. თანამშრომლობდა რიკარდო მუტისთან, ზუბინ მეტასთან და პლასიდო დომინგოსთან ერთად. არის საქართველოს ბრწყინვალების საპრეზიდენტო ორდენისა და იტალიის ვარსკვლავის ორდენის კავალერი, ხოლო 2014 წელს დააარსა საქველმოქმედო ფონდი „ნატვრის ხე“.

რევაზ ჯავახიშვილი (დირიჟორი). თბილისის სახელმწიფო კონსერვატორიის საგუნდო-სადირიჟორო ფაკულტეტის კურსდამთავრებული, ქუთაისის ოპერისა და ბალეტის თეატრისა და ქუთაისის სიმფონიური ორკესტრის მთავარი დირიჟორი. სტაჟირება გაიარა პოზნანის დიდ საოპერო თეატრში, მონაწილეობდა მასტერკლასებში ჯენოვასა და მილანში, ხოლო 2012 წელს სიენაში, კიჯის აკადემიაში, მაესტრო ჯანლუიჯი ჯელმეტის ხელმძღვანელობით დახვეწა ოსტატობა. თანამშრომლობს თბილისის ოპერისა და ბალეტის თეატრთან, საქართველოს სიმფონიეტასთან, აჭარის სიმფონიურ ორკესტრთან და მოწვეულ დირიჟორად საერთაშორისო ორკესტრებთან, მათ შორის ისრაელის „Tel-Aviv Soloists“-თან, სკოპიეს საოპერო თეატრთან და ოპოლეს ფილარმონიულ ორკესტრთან.

ეს იქნება საღამო, სადაც ქართული საოპერო სცენის ორი გამორჩეული ხმა და გამოცდილი დირიჟორი თეატრის სიმფონიურ ორკესტრთან ერთად ვოკალური მუსიკის საუკეთესო ნიმუშებს შემოგთავაზებს.

თარიღი: 15 დეკემბერი, 2026

დრო: 19:00

ადგილი: თბილისის ვანო სარაჯიშვილის სახელობის სახელმწიფო კონსერვატორიის დიდი დარბაზი

მისამართი: გრიბოედოვის ქ. №8.

პროგრამაში წარმოდგენილი კომპოზიტორები

ამ საღამოზე შესრულდება შემდეგი კომპოზიტორების მუსიკა:

ჯუზეპე ვერდი

ჯაკომო პუჩინი

ჟორჟ ბიზე

კამილ სენ-სანსი

პიეტრო მასკანი

ნინო როტა

ფრანჩესკო ჩილეა

მხარდამჭერები

ფესტივალის მუდმივი მხარდამჭერები არიან საქართველოს კულტურის სამინისტრო და ქალაქ თბილისის მუნიციპალიტეტის მერია.