აგრარული უნივერსიტეტის სტუდენტების საკურსო ღვინოების დეგუსტაცია

უკვე მერვე წელია, ტრადიციულად გეპატიჟებით 8000 მოსავალში აგრარული უნივერსიტეტის სტუდენტების საკურსო ღვინოების დეგუსტაციაზე!

 შაბათს, 4 ივლისს, 14:00 საათზე, 8000 მოსავლის აბაშიძის ფილიალში 7 სტუდენტური ჯგუფის მიერ წარმოდგენილ 25 სხვადასხვა ღვინოს გავსინჯავთ. 

 თითოეულმა გუნდმა სამი განსხვავებული ღვინო შექმნა - ქვევრის, კლასიკური და წითელი. რამდენიმე გუნდი დამატებით წარადგენს პეტნატსა და შემაგრებულ ღვინოსაც.

სტუდენტები თავად არჩევენ ყურძნის ჯიშსა და ღვინის დაყენების ტექნოლოგიას, მართავენ ღვინის შექმნისთვის საჭირო ყველა პროცესს (ვენახიდან ბოთლის ეტიკეტამდე) და ამუშავებენ ღვინის კონცეფციას. დეგუსტაცია კი მათი მრავალთვიანი შრომის შედეგების საჯარო წარდგენაა.

 ეს არის შესაძლებლობა, პირველებმა აღმოაჩინოთ მომავალი მეღვინეების ნამუშევრები, გაეცნოთ მათ, მოისმინოთ თითოეული ღვინის ისტორია და საკუთარი შეფასებაც გაუზიაროთ.

 ბილეთის ღირებულება 15 ლარია. ბილეთების შეძენა ადგილზე, ნაღდი ანგარიშსწორებით იქნება შესაძლებელი. შემოსული თანხა სრულად გადაეცემათ სტუდენტებს.

 გელოდებით, რათა ერთად გავიცნოთ ქართული მეღვინეობის მომავალი თაობა და მათი პირველი ღვინოები.