ნადერისა და სიმინის განქორწინება

ერთი შეხედვით — ოჯახური დრამა, რომელმაც თავისი გულწრფელობითა და ემოციური სიღრმით მთელი მსოფლიოს მაყურებელი და კინოკრიტიკოსები შეძრა. თუმცა ცოლ-ქმრის განქორწინება ამ ისტორიის მხოლოდ დასაწყისია.

სიმინისთვის გადაწყვეტილება უკვე მიღებულია — მას სურს ქვეყნიდან წასვლა და ქალიშვილის თან წაყვანა. ნადერი კი წასვლას არ აპირებს, რადგან მძიმედ დაავადებულ მამაზე ზრუნავს. და ეს მხოლოდ დასაწყისია. რა მოხდება შემდეგ, უმჯობესია თავად აღმოაჩინოთ.

ფილმმა თითქმის 60 საერთაშორისო ჯილდო მოიპოვა, მათ შორის — „ოსკარი“ (ირანული კინოს ისტორიაში პირველი) და ბერლინის კინოფესტივალის სამი „დათვი“. „განქორწინება“დაძაბულობით ჰიჩკოკის დეტექტივს მოგვაგონებს, თუმცა მისი მთავარი ძალა იმაშია, რომ ირანული ყოველდღიურობის ფონზე გვიყვება სრულიად უნივერსალურ, ყველასთვის ნაცნობ ადამიანურ ისტორიას — სიყვარულზე, პასუხისმგებლობაზე, სიმართლესა და იმ რთულ არჩევანებზე, სადაც სწორი პასუხი ხშირად უბრალოდ არ არსებობს.