სამყაროს შემეცნების ფილოსოფიური პერსპექტივა

აზროვნების აკადემიაში გაიმართება სალონური საუბრები ფილოლოგიის დოქტორ, ფილოსოფოს ანა ქირიასთან

შეხვედრა შეეხება სამყაროს შემეცნების ფილოსოფიურ პერსპექტივას და მასში განიხილება ფილოსოფიის, როგორც შემეცნების ფორმის როლი და სპეციფიკა. განვმარტავთ, რით განსხვავდება ფილოსოფიური მიდგომა შემეცნების სხვა სახეებისა და დისციპლინებისგან, როგორ იმკვიდრებს ის საკუთარ თავს როგორც დამოუკიდებელი კრიტიკული განსჯის საფუძველი და აქვს თუ არა მას პრეტენზია უპირატესობაზე სხვა შემეცნებით პრაქტიკებთან მიმართებით.

ლექციაში ცენტრალურ მნიშვნელობას იძენს ფრიდრიხ ნიცშეს პერსპექტივიზმის იდეა, რომლის თანახმადაც ობიექტური ცოდნა არ არსებობს, ხოლო რაც უფრო მრავალთვალს ჩართავ მოცემულობის შესამეცნებლად, მით უფრო სრულყოფილი იქნება გაგება. ამ კონტექსტში აღინიშნება, რომ ფილოსოფია სწორედ ის სივრცეა, სადაც მრავალფეროვანი ხედვების ერთმანეთთან შეპირისპირება და კრიტიკული ანალიზი შესაძლებელს ხდის აზროვნების გაფართოებას.

 განსაკუთრებული ყურადღება დაეთმობა ფილოსოფოსის ფენომენს – ვინ არის ის, როგორ ფიქრობს, რას აკეთებს და როგორ ფორსირებს თვითშემეცნების პროცესს. განხილული იქნება ფილოსოფიური აზროვნების ტექნიკა, როგორც ტრანსფორმაციული მოქმედება და არა მხოლოდ გონებრივი ვარჯიში. თვითშემეცნების, ინტენსიური განსჯის, ბასრი კრიტიკისა და ღრმა ემპათიის უნარი განიხილება როგორც ფილოსოფოსის არსებითი უნარები.

ლექციაში დაისმება შემდეგი საკვანძო კითხვები:

– რა ისტორიულ პირობებში წარმოიშვა ფილოსოფია?

– როგორ პასუხობდა და პასუხობს ის დროულ პრობლემატიკას?

– და შეძლებს თუ არა ფილოსოფია მომავალში შეინარჩუნოს თავისი როლი, ან დადგება თუ არა ეტაპი, როცა იგი აღარ იქნება საჭირო?

შეხვედრის ხანგრძლივობა – 2-3 საათი